Davao City – Dili una paagian sa mga motorista ang karsada sa Barangay Megkawayan, Calinan padulong sa Barangay Malabog, Paquiabato, Davao City human kini naguba ug na-report kagahapon sa buntag (November 12, 2021).
Sa interbyu sa DXDC RMN Davao kang Police Corporal Junrey Ronquillo sa Paquibato PNP, gisaysay niini nga nagbaton na daan og liki-liki kun crack ang dalan ug natiwasan kini tungod sa nasinatiang kusog nga mga pag-ulan.
Matud ni Ronquillo, napaabot na sa Davao City Disaster Risk Reduction and Management Office (CDRRMO) ang maong problema aron mapaabot usab sa Department of Public Works and Highways (DPWH) ug gilayong maaksyonan.
Hinuon, gilayong nasirad-an ang karsada aron malikayan ang aksidente o unsa mang disgrasya sa maong area.
“Gisirad-an temporary kay dili man gyud maagian basin naa pay madisgrasya nga (motorista) nato. Napaabot na sa City Disaster tapos gipaabot napud nila (sa DPWH),” matud ni Ronquillo.
Samtang temporaryo pang sirado ang karsada, abiso sa awtoridad nga muagi una sa laing ruta ang mga padulong sa Paquibato, mamahimo una silang muagi sa Dacudao lapos sa Brgy. Dalagdag ug kung gikan downtown, mamahimong muagi sa Callawa lapos sa Brgy. Fatima.
RadyoMaN Kirby Manzon
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
