General Santos City—Swerting naluwas ang usa ka habal-habal driver apan way swerti usab nga guba gyud ang iyang motorsiklo human gianod sa tubig baha sa sapa sa may Sitio Culambog, Barangay Datal Bucay, Glan Sarangani Province alas 6:00 ang takna sa gabie sa nakalabayng adlaw.
Biktima giilang si jhon Bert Talahawa, 23 anyos, residenti sa maong lungsod.
Sa imbistigasyon sa Glan PNP nasayran nga gikan sa Sitio Tipang, Glan ang biktima pag abot sa sapa nga bahin sa lugar, iyang gikarga sa balsa ang iyang motorsiklo gumikan taas ang tubig baha sa maong sapa.
Apan pag-abot sa tunga-tunga nga bahin mikusog ang bul-og sa tubig baha mao nga nalamba ang balsa sa pangpang hangtud nga nahulog ang biktima apil ang iyang motorsiklo.
Paspas man kining naluwas apan guba gyud ang iyang motor human nga naanod pa kini sa tubig. Sa karon luwas na sa kuyaw nga kahimtang ang habal-habal driver.
