General Santos City–Positibong giila sa ilang pamilya ang tulo ka miyembro sa NPA nga una nang namatay atol sa nahitabong engkwentro sa Magpet, North Cotabato niadtong nakalabayng Byernes sa kaadlawon.
Mga namatay mao silang si Jonelle Cabahug Entero, 27 anyos, Jowelle Cabahug Entero, pulos residenti sa barangay Manambulan, Tugbok District Davao; ug Roland Paran Tuloy, 22, residenti sa Barangay Guianga Tugbok District, Davao City.
Sumala sa wala magpailang inahan sa usa sa namatay nga wala sila masayud nga nisulod na diay sa kalihukan sa walhong pundok ang iyang anak. Nasayran nga kalit ra matud pa kining nahanaw sa ilang lugar usa na katuig kapin ang nakalabay.
Nasayran nga dugay na nilang gipangita ang ilang anak human kining wala na makauli sa ilang panimalay. Nakurat nalang sila dihang nakaabot ang report ngadto kanila nga namatay sa engkwentro ang iyang anak tali sa militar nga sakop sa 19th Infantry Battalion.
Subay sa report miyembro sa Pulang Bagani command 2 ang tulo ka mga miyembro sa NPA nga namatay atol sa maong engkwentro.
