Maayon, Capiz – Nakilala na ang persona nga responsable sa pagluthang sa isa ka babaye samtang yara sa bilasyonan sa Barangay Piña, Maayon,Capiz. Ginkilala ang suspek sa kay Richard Caliso y Delmido sang nasambit nga barangay.
Positibo nga ginkilala sang biktima nga si Lady Jane Obligado, 45-anyos sang Barangay Piña si Caliso nga amo ang responsible nga nagluthang sa iya gamit ang 12 gauge shotgun (pugakhang) kun sa diin nag-angkon sang igo sa likod ang biktima.
Una nga gindala sa Bailan District Hospital ang biktima, apang gintransfer ini sa Roxas Memorial Provincial Hospital para sa dugang nga pagbulong. Ginapahayag nga naakig ang suspek bangud ginatudluan ni Obligado ang asawa sang suspek nga magsugal kabangdanan nga iya ini ginluthang.
Sa subong, ginahulat na gid lamang sang mga kapulisan ang pagplastar sang affidavit sang biktima agud nga mapasaka na ang kaso batuk sa suspek.
