JANIUAY, Iloilo – Nagbaylo naman sang pahayag ang 15 anyos nga solterito, isa sa mga suspek sa paglugos-patay sa 19 anyos nga dalaga sa Barangay Abangay, Janiuay, Iloilo.
Sa interview sang RMN Iloilo kay Bunsoy, 15 anyos nga suspek, gin-aku sini nga ang iya amay nga si Rhegie Leviot amo ang nagpangamot sa paglugos-patay sa 19 anyos nga BS in Business Administration student sang CPU nga si Ronalyn Bravio.
Suno kay Bunsoy, nagtu-ad siya sang matuod nga natabo bangod nakonsensya na siya sa ila ginhimo sang iya amay.
Gin-aku man ni Bunsoy nga indi man liwan si Ronalyn sa ila bangod pakatlo (third cousin) niya ini.
Ginpahayag naman ni Police Major Dadjie Delima, hepe sang Janiuay Municipal Police Station nga halin pa kagab-i naga-upod sa ila ang amay kag naga-akto nga nagabulig gid sa pagpangita sa suspek.
Ila naman nakitaan sang inconsistencies ang pahayag sang 15 anyos nga si Bunsoy kag didto natumod nila ang suspek nga amay sini.
Sa pahayag ni Bunsoy, ginhambalan siya sang iya amay nga siya lang ang ma-aku sa krimen kag indi na ini pagdalahigon.
Subong man, indi na madala sa konsensya ni Bunsoy ang natabo kag nagtuad na ini sang matuod nga natabo sa mga kapulisan.
Sa karun ara na sa kustodiya sang Janiuay PNP ang 40 anyos nga suspek sa krimen.
NAKURSUNADAHAN, GULPI LANG GINBUTONG, GINBUNO, GINHIMUSLAN, GINLAMPUSAN KAG GINPATAY
Sa panaysayon ni Bunsoy, naka-inom sang makahulubog nga ilimnon ang iya 40 anyos nga amay sang nakita nila si Ronalyn Bravio.
Nakursunadahan sini si Ronalyn, gulpi lang niya ini ginbutong, ginbuno sa tiyan gamit ang ice pick, ginhigtan sang lubid sa kamot, ginlampusan sang tapi sa ulo, ginhimuslan kag ginpatay.
Samtang ginahimo ini sang amay, nagalantaw naman sa iya ang iya 15 anyos nga anak.
Gin-aku ni Bunsoy nga wala siya makasakit kay Ronalyn kag ginhimuslan lamang niya ini.
Suno sa iya, pagkatapos sang iya amay, ginpabulos siya sini tandog kay Ronalyn. Samtang ginahimuslan, ginpahayag ni Bunsoy nga nagaginhawa pa si Ronalyn sang amo nga tion.
Ang iya amay amo ang nagtapos sa kabuhi sang dalaga.
MAYOR BEN MARGARICO, NAGPASALIG SANG BULIG SA PAMILYA SANG BIKTIMA
Nagpasalig naman sang bulig sa nalisdan nga pamilya sang biktima si Janiuay Mayor Ben Margarico.
Suno kay Mayor Ben, wala siya maglaum nga may kasubong nga insidente nga matabo sa iya banwa.
Magahatag si Mayor Ben sang bulig pinansyal sa pamilya sang biktima.
