Unom ka empleyado sa licensing center sa Land Transportation Office -7 diha sa SM Seaside City ug laing duha ka “fixer” gipasakaan ug kaso sa National Bureau of Investigation -7 human sila nalambigit sa “fixing” sa paglukat ug driver`s license.
Ang mga gikiha nadakpan atol sa gihimong operasyon sa NBI-7 niadtong Biyernes pinaagi sa pagpakig-alayon sa buhatan sa LTO-7 .
Matud ni LTO-7 Regional Director Victor Caindec, pipila ka semana nga gipanid-an ang kalihukan sa “new license-fixing” tali sa mga fixer ug pipila ka empleyado sa maong buhatan ug namatud-an gyud ang maong reklamo .
Giaksiyonan sa LTO ug NBI ang maong reklamo nga gipaagi sa Facebook page ingon man Presidential Hotline nga 8888 labot sa giingong pagpabayad ug mas daku kay sa legal nga bayranan alang sa paglukat ug bag-ong lisensiya sa pagmaneho .
Kasong paglapas sa Anti Red Tape Act ug Anti-Graft and Corrupt Practices Act ang gipasaka sa NBI-7 ngadto sa piskaliya batok sa mga dinakpan.
