Davao City – Patay ang usa ka 43 anyos nga mag uuma human gipusil alas 8:30 sa buntag sa Purok 20 Upper Sirib Calinan ning dakbayan.
Sa report gikan sa Davao City Police Office naila ang biktima sa pangalang Arman Cloribel Cuizon samtang ang suspetsado usa ka security guard nga giilang si Rene Dominisac Gaccion, 51 anyos pariho nagapuyo sa nasangpit nga lugar.
Sa imbestigasyon sa kapulisan nasayran nga gigamit pagpusil sa suspek ngadto sa biktima ang usa ka 9mm caliber pistol hinungdan nga nakaangkon kini og samad pinusilan sa likod nga bahin sa iyang lawas.
Gidala gilayon ang biktima sa Southern Philippines Medical Center (SPMC), apan nakabsan sa iyang kinabuhi paglabay sa pila ka adlaw nga confinement.
Sumala pa gibadlong sa biktima ang anak sa suspek tungod sa saba nga andar sa motorsiklo nga nakadisturbo sa nagpadayong misa sa simbahan niadtong tungora nga niresulta sa panaglalis tali sa biktima ug suspek nga nisangko ngadto sa pagpamusil.
Nakasibat ang suspek nga target karon sa nagpadayong manhunt operation sa Calinan PNP.
Kasamang Don Pulayao
