Namaligya og baratong tambal sa Palao, gi raid sa NBI tungod sa reklamo sa pharmaceutical ug sa courier company

Gi-raid sa mga operatiba sa National Bureau of Investigation – Iligan District Office, pasado alas-5:00 sa hapon niadtong Lunes, July 22, ang usa ka sari-sari store ug gikumpiska ang daghang mga tambal nga nagkantidad ug kapin kun kulang dos milyones pesos sa Purok 9, Barangay Palao, ning dakbayan.  
Matud pa ni Atty. Abdul Jamal Dimaporo, hepe sa NBI-Iligan, nga ang maong operasyon nahitabo pinaagi sa hangyo sa usa ka courier company nga pa-imbestigahan ang ilang delivery man, tungod sa sunod-sunod nga reklamo sa mga pharmaceutical company, nga wala madawat ang ilang mga shipment sa tambal.  

Miingon si Ilian Macala, ang franchise owner sa Air 21 sa Iligan, nga kapin 500 mil pesos unta ang ilang paninglunon nga bayad sa shipment gikan sa ilang mga kliyente nga dili na mobayad tungod kay walay delivery nga nahitabo.  

Ang Boehringer Ingelhem (Philippines), Inc. sa Iligan ang labing ulahing nagreklamo sa wala miabot nga shipment sa tambal sa diabetes.  


Nadiskubrehan nga ang delivery man sa Air 21 nga si Jalil Bangcola, 42 anyos, didto gi-deliver sa tindahan sa Palao nga gipanag-iyahan sa usa ka Florencia Hinampas, sa kantidad nga kapin 10 mil pesos.  

Sa interview, gi-angkon ni Bangcola, nga duha ka higayon na siyang nag-baligya og shipment sa maong tindahan, ang una niadtong bulan sa Marso, karong tuiga.

  Gi-angkon ni Hinampas nga upat ka tuig na siya sa maong negosyo apan wala siya masayod nga nakalapas diay siya og balaod. Adunay business permit si Hinampas, apas sari-sari store ug dili pharmacy. Kinahanglan nga adunay lisensiyadong pharmacist ang usa ka botika nga mag-operate.  

Ang iyang pag-umangkon nga si Dindo Ebarle ang nagbantay sa maong tindahan dihang nahidangat ang mga operatiba sa NBI. Gi-angkon ni Ebarle nga duha ka tuig na siyang nagbantay sa maong tindahan apan wala na siya mitubag kung pila ka higayon na si Bangcola nagbaligya kaniya og kinarton nga mga tambal. Gi-angkon lamang niini nga mga medical representatives ang ubang moanha kaniya aron magbaligya og mga tambal nga sample sa doctor.  
Anaa na sa mga uthorities arrested Ebarle and Bangcola and now at the custody of the NBI awaiting for proper charges.  
Miingon si Dimaporo nga bisan paman mga authentic medicines o dili peke ang mga tambal nga gibaligya, mag-atubang pa gihapon si Ebarle og mga kaso nga paglapas sa Presidential Decree Number 1612 o ang Anti-Fencing Law tungod sa pagbaligya sa mga kinawat nga tambal.  
Nakalapas usab kini sa balaod sa Food and Drug Administration (FDA) tungod sa pagbaligya sa mga tambal nga nagkinahanglan og resita sa doctor.  

Miingon si Dimaporo nga ang mga tambal sa high blood, diabetes ug ang mga anti-biotics, kung dili insakto ang pag-inum sa pasyente tungod sa kakulangon sa prescription sa doctor, makadaut sa tawo imbes nga maka-ayo.  

Si Hinampas ipailawom pa sa dugang imbestigasyon samtang ang tag-iya sa Air 21 mopasaka og kasong qualified theft sa delivery man kinsa miangkon sa iyang gibuhat tungod kay nagkinahanglan siya, matud pa, og salapi aron ibuhi sa iyang pamilya.  

Facebook Comments