Patay ang usa ka drug pusher human misukol sa kapulisan sa Tagoloan, Misamis Oriental.
Matud ni PO2 Ismael Taruc sa Tagoloan Municipal Police Station nga ang suspek mao ang 48 anyos nga si Robert Bubida nga taga Sta. Cruz, Tagoloan sa maong lalawigan.
Gihimo ang operasyon mga alas 4:45 kagahapon sa hapon sa Zone 16, Bilayong, Sta. Cruz, Tagoloan diin napalitan si Bubida og usa ka sachet sa shabu nga nagkantidad og 500 pesos.
Sa dihang namatikdan niini nga pulis ang ka transaksyon mikuha kini sa kalibre .38 armas ug gipabuthan ang kapulisan.
Nibalos ang kapulisan ug naigo sa lawas si Bubida nga maoy hinungdan sa iyang kamatayon.
Narecover sa kapulisan ang kalibre .38 armas nga dunay tulo ka buhing bala, kwarta ug motorsiklo nga dunay sulod duha ka sachet sa gituohang layang dahon sa marijuana.
Nahimong target sa operasyon ang suspek human gitudlo sa iyang mga kauban nga una nang nasikop sa kapulisan tungod gihapon sa pagbaligya og druga.
