Davao City – Dakong hagit para sa Commission on Elections (Comelec) ang mahitabong epekto kung i-extend ang voter’s registration nga mahuman karong Setyembre 30, 2021.
Sa interbyu sa RMN Davao kang National Citizens’ Movement for Free Elections (NAMFREL) secretary general Eric Alvia, posibleng mahitabo ang extension apan maguba gayod ang nakalatag na nga mga schedule sa COMELEC.
Maapektuhan ang filing sa Certificate of Candidacy (COC) karong Oktobre 1-8, 2021 nga sa mga District offices usab iproseso, matarog ang schedule para sa Computerized Voter’s List (CVL) ug madetalar ang pag-assign sa mga botante sa ilahang mga presinto.
Matud ni Alvia, ang gihimong lakang sa mga Senador sa pagduso sa 1 month extension para mahatagan og panahon ang anaa pa sa 14-15 million ka mga potential voters nga wala pa makaparehistro tungod sa walo ka bulang nawala sa voter’s registration days nga epekto sa nahitabong mga lockdowns.
Segun ni Alvia, kung lantawon ang figures nagpabilin gihapon sa 62 Million ang registered voters sa nasud, pasabot posibleng wala kini nisaka nga maoy seryuso nga concern para sa gitinguha sa COMELEC nga dako nga turn-out of voters para sa 2022 elections.
Para kang Alvia mamahimong i-extend ang voter’s registration sa mga partikular nga lugar nga labing naapektuhan sa mga lockdowns hinungdan nga wala makagawas aron makaparehistro ang mga indibidwal.
Adunay proposal nga dawaton nalang usa ang tanang applications sa voter’s registration ug inig human na lang sa filing sa COC ipahigayon ang pagkuha sa mga biometrics sa kada aplikante, matud niini.
RadyoMaN Aimee Guinita
