General Santos City–Patay ang usa ka mag-uuma nga naila sa pangalang yol Taca,45 anyos residente sa Sitio Datal,Mangisi, Brgy.Tablu Tampakan South Cotabato, human gitigbas sa suspetsadong si Josen Cayon,29 anyos, ulitawo ug nanimuyo sa Purok Mangga sa nasampit nga Brgy.pasado alas 2:00 sa kadlawon.
Pamahayag ni Police Captain Joseph Villanueva hepe sa Tampakan PNP nga nagpungko lang sa bato ang biktima nga anaa sa impluwensiya sa ilimnong makahubog samtang dunay disco nga gipahigayon sa lugar.
Kalit matud pa kining giduolan sa suspek sa walay daghang estorya ug diretso gitigbas sa makadagahang higayon gamit ang lagaraw.
Sumala pa ni Villanueva nga naka-angkon ug mga samad sa lawas ang biktima nga hinungdan sa iyang hinanaling kamatayon.
Samtang gilayon man usab nasikop ang suspek sa lugar sa mga mirespondeng pulis human gihimo ang pagpanigbas nga kasamtangan nagtingkagol sa selda sa Tampakan MPS.
Gitin-aw sa opisyal nga duna nay panagbingkil ang duruha kalabutan sa ilang mga pamilya ug sa dihang nagkita kini sa diskohan didto na nahitabo ang krimen nga wala gilauman.
Dugang pagbutyag ni Police Captain Joseph Villanueva nga personal grudge nga dunay kalambigitan sa away sa pamilya ang ginalantaw nila nga motibo sa pagtigbas patay sa biktima.
Matud pa ni Villanueva nga anaa sa B’laan Community ang mga pamilya sa duruha nga kung dunay mahitabong away magbalusanay lang matud pa ang mga pamilya niini.
Samtang gihikay na sa kapulisan ang kasong murder nga ipasaka batok sa suspek.(Reynald Timario)
