Davao City – Patay ang usa ka lalake human tigbasa sa suspek nga iyang giilugan og hinigugma nga nahitabo sa Dumanlas, Buhangin pasado alas-10:00 Miyerkules sa buntag.
Unom ka samad tinigbasan sa nagkadaiyang parte sa lawas ang mitapos sa kinabuhi ni Efren Armado, 46 anyos, tricycle driver, ug nagpuyo sa Malalag, Davao Del Sur.
Ang biktima gitigbas sa usa ka Julius Lauron, 33 anyos, trabahante, ug residente sa Dumanlas.
Migawas sa imbestigasyon nga giilog matud pa sa biktima ang kapuyo sa suspek nga si Jennifer kung asa nag-ugat ang tumang kasuko sa mamumuno.
Ug dihang nagkita ang duruha sa usa ka karenderya sa naasoy nga lugar mibalik matud pa og sulod sa balay ang suspek ug paggawas armado na og sundang ug dayon tigbas ngadto sa biktima.
Niadtong tungora, tayming sab nagpatrolya ang Regional Mobile Force Battalion 11 nga gipangulohan ni Police Col. Roel Ybañez hinungdan nga nasikop dayon si Lauron kinsa nagtago sa ilang balay.
Ang suspek dayon kini gitingkagol sa Buhangin PNP ug kasong pagpatay ang gisang-at batok kang Lauron.
Ang patay’ng lawas ni Arnado gidala na sa punerarya sa lungsod sa Malalag subay sa pamahayag sa ig-agaw niini.
RadyoMaN Joel Viray
