General Santos City—Patay ang suspetsado sa pagpanglugos sa 4 anyos nga bata nga taga Glan, Sarangani Province nga giilang si Roberto Sentino, 29 anyos, residenti sa Barangay Burias, Glan, human nga nangilog ug pusil sa usa ka Pulis niadtong nakalabayng adlaw.
Subay sa report sa Glan Municipal Police Station nasuta nga human nadakpan ang suspek didto sa may Jose Abad Santos Davao Occidental gibyahe dayon kini padulong sa lungsod sa Glan apan samtang anaa sa tunga-tunga sa byahe, mihangyo ang suspek nga mangihi maong mihunong ang patrol car nga gisakyan sa nasangpit uban sa kapulisan nga midakop kaniya.
Dihang nakahigayon, kalit nga giilog matud pa sa suspek ang pusil sa Police nga si Po1 Morsin Ali dayon gition ngadto sa mga Police apan dali nga nakaresbak ang mga pulis nga escort sa suspek mao nga napusilan kini nga hinungdan sa iyang kamatayon.
Si Sentino suspek sa pagpanglugos sa 4 anyos nga anak sa mga tawong misagop kaniya kansa mao usab ang mireklamo ngadto sa kapulisan.
