Tapaz, Capiz- Napasakaan na sang kasu nga murder ang CAFGU member nga nagluthang-patay sa mismo opisyal sini sa detachment nga nahamtang sa Brgy. Daan Sur, Tapaz.
Sa subong padayon nga napreso sa lock up cell sang Tapaz Municipal Police Station ang suspek nga ginkilala kay Bonny Jimenez y Catamin,39-anyos sang Brgy Taganhin, Tapaz Capiz.
Sa matandaan nga nag-angkon sang nagkatuhay nga kapilasan sa iya lawas ang biktima nga si Staff Sgt. Ronilo Esoy y Bugahod,40-anyos ang pang-edaron sang Brgy. Dayhagan, Pilar makaligad ini ang ginluthang sang suspek.
Sa imbestigasyon sang mga kapulisan, bangud nga naka-heightened alert wala pagpasugtan sang opisyal ang suspek nga idul-ong ang iya pamilya sa ila poluy-an.
Suno sa hepe sang Tapaz PNP nga si Senior Inspector Edwin Luces, una na nga naglisensiya ang CAFGU member sa opisyal agud nga magbisita sa iya pamilya kag ini man ang ginpahanugotan apang pagkahapon liwat naman ini nga naglisensiya kabangdanan nga ginkaakig sang iya commander.
Posible nga nagtanum sang kalain sang buot si Jimenez sa iya opisyal gani nga nagpadulong ini sa admin office kag ginluthang ang biktima gamit ang M16 armalite rifle nga naka-“automatic mode”.
