CAPIZ – Indi mahimo nga makapungko sa pwesto ang mga nagdalaog nga kandidato nga wala naka-file sang ila Statement of Contributions and Expenditures (SOCE) sa gintalana nga panahon sang Commission on Elections, ini ang ginpahayag ni Atty. Wil Arceño, Provincial Election Supervisor. Suno diri nga ang amo nga pagsulundan ang nakasaad sa Sec. 14 sang Republic Act 7166.
Base sa record nga ginpagwa sang Provincial Comelec Office, naglab-ot sa 11 ang mga nagdalaog nga barangay kagawad sa probinsya sang Capiz nga wala naka-file sang ila SOCE kun sa diin pito ang nagikan sa Tapaz, tatlo sa Cuartero kag isa sa Dumarao.
Samtang, yara naman sa 481 ang mga SK kagawad ang napaslawan man sa pagfile sang SOCE. Pinakadamo diri ang nagikan sa banwa sang Maayon nga may 75; Cuartero – 56; Panay – 51; Pres. Roxas – 48; Pilar – 33; Roxas City – 31; Jamindan – 29; Dumalag – 28; Panitan – 27; Dumarao – 22; Sapian – 21; Mambusao – 18; Sigma – 14; Pontevedra – 13; Ivisan – 11; Dao – 8 kag 2 sa banwa sang Tapaz.
Nahibaluan nga Hunyo 13 pa ang nagtakop ang filing sang SOCE kun sa diin naglab-ot ini sa 30 ka adlaw humalin sadtong ginpatigayon ang Barangay & SK Elections sang Mayo 14 sa sini nga tuig.
