Indi mabaton sang pamilya Mahusay ang nadangtan ni Ronel Mahusay, 27 anyos sang Sitio Punting Barangay Tambaliza, Concepcion matapos napatay ang biktima bangud sa ginaalegar kapabayaan sang mga nurses kag doctor sa Western Visayas Medical Center.
Ginpahayag ni Lorie Mahusay, utod sang biktima nga sang Nobyembre 28, ginkakasan sang dextrose si Ronel kag ginpanugyanan nga mahimo na ini makakaon.
Apang suno kay Lorie, nagahingyo ang iya utod nga ibalik ang dextrose bangud indi gid ini makasarang nga magkaon ukon mag-inom man lang sang tubig bangud sang pilas sa puwak matapos nabuno sang sungo sang isda nga ‘balo’ .
Suno kay Lorie, makapila sila ka beses nga mag-request sa nurse nga ibalik ang dextrose bangud ginagutom na gid ang biktima apang nag-out lang ang nurse kag wala gid na follow-up ang ila request.
Kahapon sang kaagahon, Nobyembre 29, nagkurog ang biktima tubtob gindeklara sang doktor nga napatay bangud sang balatian sa tagipusuon.
Indi naman magpati si Lorie sa findings sang doktor kag ginpamilit nga napatay ang iya utod sa gutom bangud ginpabay-an sang hospital .
Ginpahayag ni Lorie nga nag ‘sorry’ lang ang mga doktor kag nurses bangud sang natabo.
Madumduman nga sang Nobyembre 23, ginderetso sa operating room sang Western Visayas Medical Center si Ronel Mahusay matapos natuhog ang iya puwak sang sungo sang isda nga ‘balo’ sang magsalum sa dagat .
(photo from web)
