Davao City – Pagbugal-bugal sa balaud ang pagsapubliko sa pangalan sa mga barangay officials nga nalakip sa narco list ni Pres. Rodrigo Duterte sulod karong adlawa.
Pagyaga-yaga sa balaud sa Pilipinas ang pagpublikar sa Philippine Drug Enforcement Agency (PDEA) sa mga pangalan sa mga barangay officials nga naapil sa listahan ni Duterte.
Matud ni Magdalo Partylist Representative Gary Alejano, tataw kaayo nga wala muagi sa proseso sa balaod ang pagbulgar sa mga pangalan sa mga barangay opisyales kay kun miagi pa lang unta napasakaan na sila og kaso ug nataktak na unta sa serbisyo.
Wala gipadaplin ni Alejano ang posibilidad nga adunay mga barangay officialsl nga nalambigit sa ilegal nga droga apan gikinahanglan muagi gihapon sa proseso sa balaud ang tanan bisan pa og klaro na ang kalambigitan niini.
Girason pa ni Alejano nga magmugna og trauma sa barangay officials ug sa ilang pamilya kun mapublikar ang ilang pangalan apan dili diay tinuod ang mga pasangil batok kanila.
Giingon sa magbabalaud nga makapaguba lang sa kinabuhi ug sa pagka-tawo ang buhaton sa PDEA karong adlawa diin gipamugos niini nga kun aduna ma’y lama sa kamatooran ang narco list ni Pangulong Duterte nan mas labing maayo kun sang-atan na lang og kaso sa korte ug dili na nganlan pa sila sa publiko.
RadyoMaN Joel Viray
