Davao City – Dili pa masuta sa Philippine Drug Enforcement Agency (PDEA) XI kung subli ba nagpapili sa taliabot nga Barangay ug SK elections karong Mayo 14 ang 13 ka mga opisyales sa barangay nga gikonsiderang narco politicians sa rehiyon onse.
Sumala ni PDEA XI Director Antonio Rivera nga ila pang subayon kun nagduso ba ang narco politicians og certificate of candidacy sa buhatan sa COMELEC aron magpapili pag usab sa piniliay sa Mayo.
Ang 13 ka mga opisyales gilangkoban sa kagawad, kapitan ug usa ka konsehal sa lungsod apan ang pinakadaghan niini pulos matud pa mga kagawad.
Dugang ni Rivera nga miagi sa makuti nga balidasyon ang nasangpit nga pangalan sa mga opisyal ug nakumpirma ang ilang kalambigitan sa iligal nga droga.
Hinuon wala na gidetalye sa opisyal kung unsang matang sa pagkalambigit sa droga ang giapilan sa mga opisyales.
Nasumite na matud pa ang ilang mga pangalan sa PDEA headquarters ug hayan lakip kini mapublikar sunod semana.
RadyoMaN Don Pulayao
