Davao City – Dili buot kumpirmahon sa 10th Infantry Division Philippine Army kung aduna ba’y lama sa kamatooran ang pagduda sa uban nga nagkunsabuhanay ang sindikato sa droga ug ang mga terorista sa pagsabwag og kagubot aron ang kagamhanan mawala sa focus sa giyera kontra droga ug terorismo.
Gisulti ni 10th ID spokesperson Capt. Jerry Lamosao nga maglisod sila og kumpirma sa duda sa uban sanglit wala pa sila’y nakalap nga impormasyon nga nag-usa na karon ang puwersa sa sindikato sa droga ug ang mga terorista aron samukon ang kagamhanan pinaagi sa pagpamomba sa pipila ka dapit sama sa Jolo Sulu nga daghan ang namatay ug nasamdan sa kapin semana na nakalabay.
Gipaniguro ni Lamosao nga luwas ang mga lugar nga nahisulod sa ilang area of responsibility gikan sa hulga sa mga dautang element sama sa Ajang-Ajang Group sa teroristang Abu Sayyaf apan kun aduna man, sigurado dili sab sila mulampos sa ilang niloog nga tinguha.
Alang ni Lamosao nga ang presenteng mga balaud kontra terorismo pupaigo na kini aron mabatukan ang mga terorista gikan sa paghimo nila og dinautan nga buhat kung asa ang mga sibilyan maoy ilang pa-borito nga biktimahon.
Wala nagpakita og pagsupak si Lamosao ugaling magpanday og balaud nga magpahamtang og silot-kamatayon sa mga durugista ug sa mga terorista nga kinsa mokutlo sa kinabuhi sa mga yanong lungsuranon ug mokaraw sa kahapsay ug kalinaw sa atong nasud.
RadyoMaN Joel Viray
