Report ni: Tita Jen Palomo Debaja
Matam-is na nga mga yuhom ang makit-an sa 2 ka OFW matapos natigayon nga marescue sang taga embahada sa manyak nila nga amo sa Cairo Egypt.
Nangayo sang bulig si Jonna Salutin Facularin 29 anyos sang Brgy. Bantayan, San Enrique Iloilo kag ang upod sini nga si Rose Jean Robles 28 anyos sang Bulacan, matapos pareho sila nga tuyo molestiyahan sang amo nga Egyptian.
Sa panaysayon ni Jonna, takna alas 9:00 sang huwebes sang nag abot ang taga Philippine Embassy sa poluy-an sang amo agud makig negosyar angut sa ila reklamo. Nakipag estorya ang ila amo nga babaye apang sang nag gwa ang amo nila nga lalaki, ginpalayas sini ang taga embahada.
Pilit man nga ginkuha sang lalaki nga amo ang cellphone ni Jonna paagi sa pag gan-it sang buhok sini kag gintiklod sa semento. Gasgas ang naangkon ni Jonna sa tuhod kag ginsinggitan siya sang amo nga maglayas.
Tungod naga ulikid man ini sa upod nga si Rose Jean nagpamatok siya nga maglakat. Mismo amo nila nga babaye ang nagtulod kay Rose jean gani nagpalayo ang mga ini kag dali-dali nga nangayo sang bulig sa kaingud nga pinay agud kuntakon ang taga embahada.
Maayo lang wala pa gid nakapalayo ang rescue team kag natigayon sila nga marescue kag gindala sa embassy.
Nahibaluan nga una nag abot sa Saudi si Jonna kag Rose Jean apang nakibot nalang ang mga ini nga sa Egypt na sila ginpa obra.
Ginpalab-ot man nila sa HIGHMARK MANPOWER kag ANCHOR MANPOWER AGENCY ang ila sitwasyon apang permi lang pasalig kag wala sang aksyon.
Sa karon, yara na sa luwas nga kahimtangan si Jonna kag Rose Jean sa Philippine Embassy sa Egypt kag hulaton nalang ang settlement sang amo agud makapauli na sila sa tagsa ka pamilya sa Pilipinas.
