TACLOBAN CITY – Gintagan han gobyerno hin nagkakantidad 3.6 billion pesos nga pondo an Department of Agriculture Region 8 tikang ha Yolanda Rehabilitation Fund para gamiton ini marihabilitar an ngatanan ha Agrikultura dinhi ha aton dapit.
Nahinabo an Bagyong Yolanda dida han tuig 2013 pero umabot an pondo ha buhatan dida la han Abril yana nga tuig sanglit namomroblema yana an Departamento ha Agrikultura kun aanhon ini paggastos nga sugad hini kadako nga kwarta kun gamay la iton panahon nga iginhatag ha ira tubtob la katapusan hiton adlaw han Desyembre yana nga tuig.
Diri ngani ini magastos nga kwarta in igkakadto ini ha Marawi City para hiton rehabilitation ngadto.
Ha Press conference, sumala han bag-o nga Dept. of Agriculture Regional Director nga hi Atty. Salvador Deputado, mayada 1.6 billion pesos nga unobligated funds nga kinahanglan maubos pag implementar hin mga programa para ha mga parag-uma yana nga tuig.
“Ini nga 1.6 billion pesos we are given up to the end of December to obligate this funds. Kun diri naton ma obligate ini nga funds i-dadivert ini ngadto ha Marawi City. Ano man it karuyag sidngon hini, gintagan na kita hin kwarta, ipapagastos ha aton, diri pa naton gagastuhon.”
Pero an problema sumala kan Deputado, kinahanglan magastos ini nga kompleto iton mga requirements nga ipapasa ngadto ha Commission On Audit kay kun diri hira iton kwekwestyunon hiton COA kun gin-ano nira paggastos an mao nga kwarta.
Usa ha mga gin aaro han COA nga requirements an Municipal Resolution tikang ha bungto nga maiimplementaran han programa han Dept. of Agriculture pero sumala kan Deputado dako nga problema ha LGU level kay politika iton nagiging rason kun kay ano nadudugayan ini nga maupay nga programa para ha mga parag-uma.
“Magkontra man iton Mayor ngan Vice-Mayor ngan it Sanggunian in kontrol man hiton Vice-Mayor so kun ano iton aruon hiton Mayor diri mahatag iton Sanggunian. Diri makapagsumbit hiton resolution tikang ha Sanggunian, aanhon man naton iton pagsolbar. Isgan naton iton Mayor, isgan naton iton Vice Mayor ngan Sanggunian.” Siring ni Director Deputado.
Hangyo han Dept. of Agriculture ngadto ha Local Government Unit nga magkaurusa pag implementar hini nga mga programa han ahensya han gobyerno kay para man ini hiton mga parag-uma han kada bungto.
Kanugon nga ini nga kwarta para han mga biktima hin Bagyong Yolanda in mahihingadto ha Marawi City.
