NASUNOG | Ilonggo seaman, patay matapos masunog ang ginasakyan nga towboat sa United Arab Emirates (UAE)

Patay ang wala pa ginhingadlan nga Ilonggo seaman samtang napilasan ang duha sini ka kaupod matapos magluntad ang sunog sa ila ginasakyan nga towboat malapit sa Al Fujairah sa United Arab Emirates.
Natabu ang insidente sang Pebrero 23 sang kaagahon kon sa diin nagabiyahe ang towboat halin sa India padulong sa Ajman, UAE sang magtuhaw ang kalayo kag nasunog ang nasambit nga sakayan.

Ginapahayag nga may walo ka crew ang towboat nga ginalakipan sang anum ka Ilonggo kag duha ka Indians.

Yara na karon sa morgue sang isa ka ospital sa Al Fujairah ang bangkay sang nasambit nga Ilonggo seaman samtang padayon naman nga ginabulong sa amo nga ospital ang isa pa ka Ilonggo nga napilasan sa insidente.


Suno sa Philippine consulate sa Dubai, wala anay ginhingalanan ang napatay nga seaman kag ang mga napilasan samtang wala pa mapahibalo ang ila tagsa pamilya.

Facebook Comments