Gipagawas sa mga otoridad ang CCTV footage sa mga suspek nga posibleng nagpaluyo sa sunod sunod nga pagpamomba didto sa Jolo, Sulu nga gikamatay sa 28 ka mga tawo niadtong adlawng Domingo.
Nasayran nga adunay CCTV footage sa usa ka establishemento nga nahimutang haduol lamang sa Jolo Cathedral. Dinhi nakit-an ang tulo ka mga kalalakin-an nga gituohang myembro sa Ajang-ajang Group sa Abu Sayyaf. Kini ang gibutyag sa Armadong Kusog sa Pilipinas.
Usa ka Alyas Kamah ang nakuha sa CCTV nga nagsul-ob ug blue-green jacket nga adunay gitunol nga butang sa iyahang kaubanan human sa pagbuto sa bomba ug dayon dalagan. Kini ang gibutyag ni Lt. Col, Gerry Besana tigpamaba sa Western Mindanao Command.
Pursigido ang Malakanyang nga pulboson ang grupong nagpaluyo sa twin bombing sa Jolo sa ngalan sa hustisya sa mga nahimong biktima ug dili na makapahigayon pa ug mga pagpamomba sa bisan asang parte sa Pilipinas.
