GIPANIGURO ni Health Secretary Francisco Duque III sa Kamara nga andam na ang ahensya higayon makasulod sa nasud ang novel corona virus.
Sa pagsalang ni Duque sa Question Hour sa sesyon sa Kamara, gikwestyon kini ni Health Committee Chairman Angelina Tan kung may igo nang imprastraktura nga kayang mag-accommodate higayon nga adunay magpositibo o magbaton ug impeksyon sa NCOV.
Matud ni Duque, nag-level up ang mga ospital ug medical centers kung asa naggahin ang mga nasampit ug isolation rooms alang sa mga ipailawom sa test o magbaton ug impeksyon.
Gawas sa igong isolation rooms, gipalig-on na usab ang boarder surveillance sa mga airport ug pantalan, ingon man ang community surveillance.
Gipakusgan sab sa DOH ang public health advisories aron mahimong sakto ang ang basehan sa publiko sa pagbatok sa NCOV ug dili sila mailad sa mga gakatag nga fake news.
Sa karon may katakos na ang DOH nga ipailawom sa test ang person under investigation (PUI) human naghatag ang Japan ug RNA primer sa Research Institute for Tropical Medicine (RITM).
