Manila, Philippines – Subling gibuhi sa Philippine National Police (PNP) ang ilang kampanya batok sa mga dili otorisadong paggamit ug “wang-wang” apil na mga blinkers sa mga kadalanan.
Sumala kang PNP Spokesperson Senior Superintendent Bernard Banac, gimando na ni PNP Chief Oscar Albayalde sa Highway Patrol Group (HPG) ang mas hugtanong pagdakop sa mga motorista nga pasaway sa paggamit ug ginabawal nga wang-wang ug blinkers.
Gawas sa ilegal nga wang-wang ug sirena, hugtanon niyang ibawal ang pagbusina ug uban pang gadget nga gahimo ug alarma.
Matud ni Banac, pwedeng ma-revoke ang Certificate of Registration sa usa ka sakyanan nga adunay iligal nga accessories.
Nagpahimangno usab ang PNP sa mga kandidato ug partido nga makig-alayon kanila ug sa Local Government Unit o LGU ayha magpahigayon ug motorcade alang sa kampanya.
Gibutyag pa ni Banac, kinahanglang ikonsidera usab sa mga kandidato ang pagsunod sa road safety protocol sa ilang pagpangampanya.
