General Santos City—Samdan ang usa ka Dodoy Lumimbong, 22, residenti sa Barangay Fatima, Gensan human kining gihapak ug bato sa usa ka suspetsado samtang sila sakay sa usa ka traysikad.
Subay sa imbistigasyon sa Police Station 5 nasuta nga ala 1:00 ang takna sa kaadlawon gikan nagmeryenda ang biktima ug ang live-in partner niini nga usa ka bading, pauli na unta ang mga nasangpit apan pag abot sa may Purok Lower Acharon, Barangay Calumpang, giharangan sila sa grupo sa mga kalalakin-an.
Gibunalan ug bato ang biktimang si Dodoy mao nga nakaangkon ug samad, samtang nakapangayog tabang ang kapuyo niini sa mga driver nga nagstandby sa lugar mao nga nadakpan ang suspek nga si Nards Manatad nga taga Purok Balunto, Barangay Labangal.
Sa karon ang suspek balhog na sa silda sa Police Station 5 ug gihuwat nalang sa kapulisan ang desisyon sa biktima kung ila bang pasakaan ug kaso ang suspetsado.
