General Santos City—NATIONAL Bilibid Prison (NBP) sa Muntinlupa ang gitudlong usa sa mga source sa shabu nga gasulod matud pa dinhi sa SOCCSKSARGEN Region.
Kini ang gikumperma ni PDEA-12 Regional Director Gil Castro, base kini sa impormasyon nga ilahang nakuha sa “green book” gikan sa panimalay ni Maasim, Sarangani Mayor Anecito Lopez. Dugang pa ni Castro nga na-establish nila ang link sa mga impormasyon nga ilahang mga nakuha sa mga anti-illegal drug raid dinhi sa Region 12.
Gawas matud pa sa NBP, may shabu usab nga naggikan sa Ozamis City, Cotabato, Maguindanao, Marawi, Lanao del Sur, Misamis Occidental og Digos City. Nakasulod matud pa ang shabu sa SOCCSKSARGEN pinaagi sa land og sea routes, sakay ang mga public o private transportation.
May mga source usab sa droga nga ginaagi sa mga shoreline sa Sultan Kudarat sakay sa mga vinta o motorboats padulong sa nagkalain laing mga lugar sa Rehiyon-12.
Samtang giklaru usab ni Castro nga Kiblawan, Davao del Sur og dili sa Malungon, Sarangani Province ang source sa mga marijuana sa Rehiyon.
Kahibaluan nga dugay nga milutaw ang mga pangalan sa Malungon nga maoy producer og cultivator sa marijuana apan sa ilahang gihimong pagpanubay milutaw nga ang mga Marijuana ang naggikan sa Kibalawan Davao Del Sur. (Emir Bariquit)
