Davao City – Human sa duha ka bulan sa mapait nga insidente sa sunog sa NCCC Mall Davao sa milabayng tuig nga miresulta sa pagkamatay sa 38 katawo, laumang i-demolish na ang nasangpit nga gambalay sunod bulan.
Sumala ni City Building Official officer-in-charge Cirinia Grace Catubig, giaprubahan sa CBO niadtong Pebrero 20 ang application sa NCCC Management alang sa permiso sa pagdemolish sa maong building.
Dugang ni Catubig nga ang maong permit nagkanayon nga kinahanglan kumpletuhon sa management ang demolition sulod sa 30 ka adlaw gikan niadtong Pebrero 20.
Matud pa nga mi-apply ang NCCC Management alang sa demolisyon niadtong Pebrero 2 apan sa karon, wala pay eksaktong petsa ang maong management kung kanus-a idemolish ang nasunog nga building.
Sa pikas bahin, ginasulayan pagtawag sa DXDC RMN Davao team si Interagency Anti-Arson Task Force deputy team leader ug spokesperson Fire Supt. Jerry Candido alang sa update sa imbestigasyon sa maong sunog apan hangtod karong mga panahona wala pa kini mitubag ug laumang makakuha og update gikan sa iyaha human sa duha ka bulan nga insidente.
RadyoMaN Renz Barbarona
