Davao City – Gireklamo sa usa ka negosyante ang usa sa iyang mga trabahante sa dihang gikawatan kini og kwarta.
Personal nga midangop sa Talomo PNP ang usa ka Marivel Garcia Berhagen, 26 anyos nga taga Tarlac City ug dunay bayad center sa may Matina crossing ning siyudad.
Matud pa sa complainant nga iyang gibutang ang halin sa iyang negosyo sulod sa usa ka envelope ug gibutang sa cash box nga mokantidad og dul an 35,000 pesos.
Gidugang sa complainant nga kalit na lang nahanaw ang salapi sa dihang iya na unta kini ipambayad sa mga galastohon.
Sa imbestigasyun nga gihimo sa kapolisan migawas nga niadtong tungora nga ang trabahante niya nga si Lalaine Hermocilla Saballa ra ang tawo sulod sa maong opisina.
Gidugang sa mga kapolisan nga aduna nay rekord ang suspek sa pagkawala usab sa dakong kantidad sa salapi nga padayun pang ginabayran hangtod karong panahona.
Sa kasamtangan mibalibad sa akusasyon ang maong suspek samtang ang kaso gipasa na ngadto sa theft and robbery section ug ginasubay nila kun duna bay CCTV nga gimuntar sa maong lugar.
RadyoMaN Paul Canono
