Dipolog City – Daw nahugno ang gibate sa usa ka negosyante human nasayran ang gipangompra niining kwarta nga unom ka tag usa ka libo ka pesos, polos mga peke.
Nagpatabang sa Dipolog PNP ang biktima nga si Eufemio Buante, 59 anyos ug tag iya sa Buantes store diin nahimutang sa Brgy. Turno ning siyudad.
Saysay pa sa biktima ngadto sa kapolisan nga pasado alas 9:00 ang takna sa buntag samtang nangumpra siya sa Agricultural Supply sa may Barra ning siyudad, iyang gitunol ang 6 mil ka pesos nga tag usa ka libo apan gibalik kini sa cahier sa maong tindahan human nasuta nga polos peke ang gitunol niining mga kwarta.
Gikaingon sa biktima nga ang maong mga kwarta halin kini sa iyang tindahan sa miaging adlaw diin gibayad sumala pa sa wala mailang kustomer.
Namatikdan sa kapolisan nga ang unom ka tag usa ka libo ka pesos, parehas ug serial number nga GE 035476 ug anggid-anggid gayud sa original apan baga-on og adunay pagka kuspaw tima-ilhan nga peke.
Gumikan sa maong insedente nag-awhag na karon ang kapolisan ning dakbayan ngadto sa gagmay’ng negosyante nga sagad maoy palutsan, diin magbinantayon sa kanunay og suta-on pagayo ang gibayad nga kwarta sa ilang kustumer aron di mabiktima sa peke’ng kwata.
