Arestado ang ginapatihan miyembro sang drug group kag isa ka negosyante nga nalakip sa high level drug dealer sa ginpatigayon nga search operation sang gintingob nga pwersa sang Philippine Drug Enforcement Agency ukon Pdea 12, Joint Task Force (JTF) GenSan kag SAF sa Purok Kaunlaran, Brgy. Sto. Nino, Koronadal City, South Cotabato pasado alas 6:15 kahapon sang aga.
Ginkilala ang suspek kay Ruel Lalisan Espinosa, alyas “Balong” ginakabig nga high value target, 54-anyos, negosyante kag residente sang Block 2, Callejo Subd., Brgy. GPS, Koronadal City.
Si Espinosa ang miyembro suno pa sang El Patron Drug Group nga nagaoperate dire sa syudad sang Koronadal kag kaiping nga syudad kag munisipalidad kag ginagamit suno pa sini ang iya nga negosyo para sa drug trade.
Nakuha naman sa posisyon sang suspek ang more or less one hundred (100) grams sang suspected “shabu” nga nagakantidad sang Five Hundred Thousand pesos (Php 500,000.00), 1 digital weighing scale, 1 rifle grenade, 1 para ordnance caliber 45 kag 1 Hi cap cal. 45 magazine nga may 12 ka rounds live ammunitions.
Samtang sa search operation naman pasado alas 7:50 sa iya puluy-an nakumpiskar naman ang 2 ka unit sang M4 rifle with magazine nga kargado sang 30 ka mga bala, 1 ka caliber 22 airgun rifle kag 1 ka aluminum container with airgun ammunition.
Kaso naman nga pagbayolar sa Section 11 sang RA 9165 kag RA 10591 ang ipasaka batok sa suspek nga nakadentine sa PDEA XII Detention Center.
May-angot sini ginpasiguro ni Pdea 12 Regional Director Gil Cesario Castro nga magafocus na ang ila nga drug war sa mga drug lords sa rehiyon.
