Tuman nga paghinulsul sa subong ang nabatyagan sang isa ka negosyante matapos natunaw nga daw kasubong sang bula ang iya sini nga kwarta sa lalaki nga nakilala lamang sa social media kag nakumbinsi nga mag-invest sang cash kag ginpasaligan sang 300% nga interest sa sulod lamang sang 15 ka adlaw.
Suno kay Ms Cel, isa ka negosyante diri sa syudad sang Koronadal nakilala lamang nya ang suspek nga si alyas Raymond Inion, 32anyos nga taga Zamboanga City subong nga tuig pinaagi sa facebook kag napapati suno pa nga magpasakop sa isa ka investment nga may dako nga porsyento nga balik sa malip-ot nga panahon.
Nadala suno pa ang biktima sa matam-is nga tinaga sang suspek matapos nakahatag sang pauna nga P5,000 nga cash kag nasundan pa sang P10,000 pagkaligad sang duha ka adlaw, pero nakabwelo suno pa ang biktima sa diin nakumbinsir pa ini nga magdugang pa gid sang P100,000.
Kabug-san nga P115,000 tanan ang nahatag sang biktima sa suspek, pero ginkakibot na lamang sini bangud sang nagligad nga Pebrero 13 subong nga tuig, indi na makontak ang suspek bangud gin-delete na sini ang iya facebook account.
