Malampusong nasikop sa mga kapulisan ug sa mga personahe sa Bureau of Internal Revenue (BIR) ang usa ka negosyante nga illegal nga namaligya og sigarilyo atol sa pag-implementar sa Mission Order sa BIR pasado alas 11 sa buntag kagahapon didto sa Purok-4, West Kibawe, Kibawe, Bukidnon.
Giila ang negosyanteng nadakpan nga si Lito Castilla, 48 anyos, minyo, ug residente sa naasoy nga lugar.
Narekober gikan sa posesyon sa negosyante ang muabot sa 291 ka mga reams sa sigarilyo, ug laing 241 ka mga kaha niini.
Samtang dol-an 700 ka mga reams sa sigarilyo ang nakompiska pa sa mga otoridad sa laing duha ka mga warehouses nga girombo sa duha ka mga lahing lugar sa lungsod sa Kibawe.
Gibana-bana nga mukabat sa P840,000.00 ang kantidad sa mga nakompiskang sigarilyo nga gidala na karon sa kustodiya sa BIR.
Samtang ginaandam usab ang tokmang kaso batok sa dinakpang suspetsado.
Facebook Comments
