*General Santos City— Negosyo ang usa sa mga motibong ginatan-aw karon sa kapulisan sa pagpusil patay sa biktimang si Rudy Pasandalan, 43 anyos nga residente sa Prk. Malinwon, Polomolok, South Cotabato.*
*Sumala kang Police Captain Samuel Bascon, Deputy Station Commander sa Polomolok PNP nga subay sa ilahang imbestigasyon nagapamaligya ug isda ingon man karne ang biktima.*
*Pauli na unta kini gikan sa merkado publiko sa Polomolok uban ang iyahang pamilya dihang nahitabo ang pagpamusil.*
*Dugang pamahayag ni Pol. Captain Bascon nga nagpabilin pang walay ilhanan ang duha ka mga suspek nga sakay sa usa ka motorisklo. Base matud pa sa pamahayag sa pamilya kalit lang nga mibabag kanila ang mga suspek dayon pusil sa biktima igo sa iyahang ulo ug likod.*
*Narekober sa crime scene ang mga basyo sa kalibre 45 nga armas nga maoy gituuhang gigamit sa maong pagpamusil. Nangita pa usab ug testigo ang kapulisan nga posibleng nakakita sa krimen gawas sa pamilya sa biktima alang sa daling pagsulbad sa kaso.*
