Opisyal na nga gin-deactivate sugod subong nga adlaw sang Biyernes ang Police Regional Office 18 kasunod sang pag-abolish sang Negros Island Region ukon Region 18.
Ginpangunahan ni pro-18 Director Police Chief Supt. Edmund Gonzales ang pag-turn over sang mga personnel, equipment, kag documents sa PRO-6 KAG PRO-7 sa ginhiwat nga seremonya sa Camp Alfredo Montelibano Sr. sa siyudad sang Bacolod.
Ang nasambit nga seremonya gintambungan ni Director Camilo Cascoilan, head sang PNP Directorate for operations.
Bangud sini, magabalik si Gonzales sa PNP headquarters sa Camp Crame samtang nagahulat sang iya masunod nga assignment.
Sang nagligad nga semana, nag-deactivate naman ang Bureau of Fire Protection 18 kon sa diin ang tanan nila nga empleyado ang naghiwat sang katapusan nga duty sang Setyembre 29.
Natalana nga mag-untat sang operation ang tanan nga regional offices sa idalum sang NIR sa maabot nga Oktubre 9 ukon 60 ka adlaw matapos ginpirmahan ni Pangulong Rodrigo Duterte ang executive order 38 nga naga-abolish sa NIR ukon Region 18.
