New CCH Hardware, gitulis; usa sa mga suspects patay human misukol sa kapulisan

76
PC: RadyoMaN Anne Jane Duhaylungsod

Gitulis sa upat ka mga lalake ang New Cagayan CCH Hardware nga nahimutang atbang sa Carmen Market mga alas 6:20 kagabie.

 

Matud sa usa ka tindera nga naila sa ngalan nga si Maria Ella Mae nga sakay sa duha ka motor ang mga suspect dihang nagpa ila kini nga customer apan dihang nakasulod gi ilogan sa shotgun ang gwardiya sa maong establisyemento.


 

Dihang pag gawas na kini sa maong hardware bitbit ang bana-bana nga 30 mil pesos, adunay duha ka mga detail nga pulis ang anaa sa atbang nga bahin hinungdan nga nakabantay kini ug daling gilakag ang mga suspect.

 

Mihimo pa sa pag sabwag sa gitulis nga kwarta ang mga suspect ug nag hostage sa usa ka babae, apan dayon ra usab kining gibuhian, hinungdan nga nag nilakagay na ang mga suspect ug mga pulis.

 

Pag-abot sa Lirio corner Oak St. dapit sa COC Phinma Education, gi singitan kini og “hunong” dala pag pasalbar apan nakig pinusilay kini sa mga pulis.

 

Gumikan niini, patay ang usa sa mga suspect nga naila sa ngalan nga si Archolito Aguinaldo Palubon, alyas Bingkol, nga residente sa Brgy. Bayabas, nga naka base sa Ozamiz City, apan mibalhin kini sa syudad, aron muhimo sa pagpanulis.

 

Nasayran nga nagsuot ang suspect sa itum nga bonnet ug itum nga t shirt, nga adunay bitbit nga sako bag. Matud sa usa sa mga witness nga unang nagpabuto ang suspect, hinungdan nga mibalos ang mga pulis samtang galakag sa suspect.

 

Dugang pa nga bisan og aduna nay igo sa lawas ang suspect, midagan gihapon kini dala sa pagpabuto.

 

Atol sa operasyon sa kapulisan, na recover ang color itum nga raider nga motor nga maoy gigamit sa mga suspect atol sa pagpanulis kinsa naka kustodiya karon sa Carmen Police Station.

 

Matud ni Police Major Ivan Vinas, ang Spokesperson sa COCPO nga usa ka organized crime ang grupo sa suspect gumikan kay modus niini nga musulod sa establisyemento nga gapanirado na, ayha mu deklara og tulis.

 

Samtang personal nga gisusi sa City Director sa COCPO nga si Police Col. Henry Dampal ang maong insidente, kinsa nag butyag nga ang grupo ni alyas Bingkol, maoy responsable sa pagpanulis sa pipila ka mga LBC Branches, lakip na ang Quality Appliance Plaza nga nahimutang sa JR Borja St.

 

Nagtuo usab kini nga kursunada ang mga suspect, gumikan kay gihimo niini ang pagpanulis duol sa Police Station 4 Carmen, apan wala nakabantay ang mga suspect nga adunay mga pulis nga nagkatag hinungdan nga nahitabo ang nilakagay.

 

Dugang pa nga mi mando na si Col. Dampal, nga magpahigayon og man hunt operation batok sa mga kauban ni alyas Bingkol, ilabina nga dugay na kining gipangita sa kapulisan.

 

Matud ni Dr. Christian Caballes, ang medico legal officer sa SOCO, nga naka angkon sa us aka samad pinusilan sa likod nga bahin sa iyang lawas ang suspect, kinsa nakuha gikan sa iya ang cal. 45 nga armas nga fully loaded ug wallet nga adunay sulod nga gituohang ginadiling druga.

Facebook Comments

From Advertisers