Davao City – Gikontra karon sa grupong Multi-Sectoral Organization ang laraw sa Inter-Agency Task Force on the Management of Emerging Infectious Diseases (IATF-EID) nga pagpatuman sa ‘New Normal’ community quarantine classification.
Sumala ni MSO Focal Person Jess Pagaran, dili pa hustong panahon karon aron mag-imposar og bag-ong normal sanglit wala pa man gihapon mikunhod ang COVID-19 cases sa Pilipinas.
Segun ni Pagaran, tingtakod pa gihapon karon diin daghan na gani ang nangamatay tungod sa kagaw busa dili pa kini ang tukmang panahon aron sugdan sa mga Pilipino ang pagkinabuhi ilawom sa bag-ong setup pinasikad sa gilaraw nga IATF directive.
Gipasabot ni Pagaran nga anaa pa sa gitawag nga transition period ang Pilipinas ug naga-adjust pa ang tanan sa pag-disiplina sa kaugalingon diha sa pag-adaptar sa bag-ong sistema sa pagkinabuhi mientras nakigtigi pa kita sa virus nga makamatay.
Ang pagpaluag sa community quarantine status mag-agad diha sa pagkunhod sa gidaghanon sa mga mataptan diin mabuntog lamang nato ang kagaw kon ang tanan matinud-anon nga motuman sa tanang health safety protocol nga gi-imposar sa gobyerno.
Apan kon padayong magmagahi ang uban diha sa pagtuman sa pagsuot og face mask, face shield ug social distancing, daku ang purohan nga padayong mosiaw ug mas musamot kadaghan ang mga virus cases sa umaabot panahon.
“Dili pa gyod (‘ta ready sa) ‘New Normal’ kay mura’g ania pa man (kita) sa season (sa takod)…Kadaghanan naga-adjust pa murag wala pa madawat ang bag-ong pamaagi sa bag-ong dagan sa atong kinabuhi kay daghan pa ang natakdan ug namatay sa kagaw…Sa atong obserbasyon, anaa pa sa transition (ang Pilipinas) kay kung muingon ko’g ‘New Normal,’ mura’g dawat na sa mga katawhan ang panghitabo, ang mga bag-ong protocols…So, hinay-hinay pa (nga) naga-adjust (ang tanan),” panapos ni Pagaran.
RadyoMaN Joel Viray
