Gina-engganyo sang National Food Authority ukon NFA ang publiko nga gamiton ang ila “kontra-abuso” hotlines nga makita sa nagkalain-lain nga provincial offices agud ipalab-ot ang mga reklamo kag i-report ang mga bayolasyon.
Luyag sang NFA nga makuha ang partisipasyon sang publiko sa ila monitoring sang presyo sang NFA rice sa mga merkado pinaagi sa pag-report sa ila hotlines.
Ginpahayag ni NFA region 6 information officer III Lalaine Doronila nga indi lamang responsibilidad sang ahensya ang pagbantay sa presyo sang bugas kabangdanan luyag nila nga magbulig ang mga konsumidor.
Diri sa Iloilo, ang NFA hotlines amo ang 0966-732-9561 kag sa NFA regional office, ang hotline amo ang 0905-439-1235.
Suno kay Doronila nga bukas ang hotline 24/7 kag mahimo ipalab-ot ang reklamo pinaagi sa tawag ukon text.
