Roxas City, Capiz – Ginpataasan na sang National Food Authority ang presyo sa pagpamakal sang humay.
Ginpahayag ni Capiz NFA Information Officer Mary Christy Harion nga nagsugod na sang Septyembre 13 sa pagpamakal sa tig P19.00 tagsa ka kilo sang humay ang NFA.
Ang amo nga presyo ang para sa matinlo kag uga nga humay nga nagalab-ot sa 14 porsyento nga moisture content.
Ini nga presyo, suno sa iya, ang mas mataas sa sadto P17.00 tagsa ka kilo nila nga pagpamakal sang humay.
Gin-athag man ni Harion nga sa karon, gindula na nila ang dugang pa nga mga insentibo subong sang drying fee, delivery fee kag cooperative incentive fee.
Suno pa sa iya nga bukas ang ila mga buying station sa ila bodega sa Bolo sa Roxas City, sa Santa Cruz sa banwa sang Dumalag kag sa Mangoso sa banwa sang Sigma.
Ginpasiguro naman sini nga may bastante sila nga pundo para sa pagpamakal sang humay sang mga mangungoma diri sa Capiz.
(c)- PIA Capiz/Gemin Guillermo
