Pagadian City – Mopahigayon ang buhatan sa National Food Authority (NFA -Zamboanga del Sur og pagpamaligya og NFA Rice nga tag P27.00 matag kilo karong adlawa, martes.
Sa nahipos nga impormasyon sa RMN Pagadian kang NFA Provincial Manager Aragasi Pasandalan, gitawag kini nga programa nga “Bigasan sa Compound”.
Makapalit hangtud sa lima (5) ka kilo ang matag kustomer ug gihangyo nga magdala lang og sudlanan. Magsugod sa alas 9:00 karong buntag hangtud alas 2:30 sa hapon ang pagpamaligya sa NFA Rice didto mismo sa buhatan sa NFA nga nahimutang sa Brgy. Tiguma ning syudad.
Nisugyot usab ang mga tinugyanan sa NFA nga mas maayo usab nga ang kuarta nga ibayad insakto o P135.00 alang sa lima ka kilo aron dili na malangan sa pagpasinsilyo.
Nanghinaut usab ang NFA nga pinaagi niining “Bigasan sa Compound” makatabang sila nga moabot ang bugas sa atong gobyerno diha sa mga katawhan nga nagkinahanglan sa barato ug kalidad nga bugas diri sa probinsiya diin makapalit sila matag adlaw nga martes, miyerkules, Huwebes ug Biyernes.
