RMN Laoag – Nakakolekta ti naruay a basura ti Movement Against Plastic Pollution (MAPP) iti igid ti baybay a paset ti Currimao, Ilocos Norte babaen ti clean-up drive.
Ti MAPP ket maysa a non-government organization (NGO) a mangaw-awis kadagiti volunteer iti beach/coastal cleanups tapno makissayan dagiti basura ken mangipaay ti lectures wenno sursuro mainaig ti umdas a panangidulin kadagiti warang ti tattao.
Indauloan daytoy ni Mrs. Patricia Dacanay-Diaz. Maysa isuna a 5 Gyres Institute ambassadress iti pagilian a Pilipinas – maysa nga organisasyon a mangitandudo iti programa kontra ti crisis ti plastic iti intero a lubong.
Kinuna ni Mrs. Dacanay-Diaz nga immabot ti 91 ti nagboluntaryo iti nasao nga aktibidad ket nakagun-odda iti 19 sako a napno iti non-biodegradable wenno narigat a marunot a basura kangrunaanna iti Pangil Rock Formation iti met laeng nadakamat a lugar. Iti 1.3 a kilometro, umabot ti 109.7 kilos ti basura iti las-ud ti maysa (1) nga oras ken duapulo (20) a minutos.
Dagiti nakolekta a basura ket dagiti sumaganad: Plastic Straws, Polystyrene or Styrofoam, Miscellaneous Plastics (disposable plates, disposable cutleries, plastic food packaging, plastic bottles, nylon, styrene, fiberglass, etc.) ken nabubuong a botbotelya — a nakawarang iti aglawlalaw ken kadagiti batbato.
Tunggal tawen, rinibribu a tonelada ti basura ti maitaytayab iti baybay, 60% kadagitoy ket plastic material wenno walo (8) a million a tonelada ti plastic.
Iti pagilian a Pilipinas, ti kabaybayan a paset ti Ilocos Norte ti maysa kadagiti nalatak a pagpasyaran gapu ta addaan daytoy ti napudaw ken sumilap a darat, corals, seagrass, batbato ken nagduduma a biag ti uneg ti baybay.
Bernard Ver, RMN News
