GIPAGULA sa Sangguniang Panlalawigan sa Bukidnon ang usa ka Resolusyon nga nagsugo sa tanang Non-Government Organizations (NGOs) nga naglihok sulod sa yutang kabilin/kayutaan (ancestral domains/lands) sa probinsya sa Bukidnon sa pagkuha ug accreditation sa National Commission on Indigenous Peoples (NCIP).
Subay sa mosyon sa Resolution No. 2021-2125(26th SP) ni Board Member Datu Richard Dinlayan Macas, Provincial IP Mandatory Representative, alang sa mga katuyoan sa pag-monitor ug regulasyon, ang NGOs nga adunay katuyuan sa pagpadagan, o ba kaha nag-operate na, sulod sa yutang kabilin kinahanglan nga accredited sa NCIP Regional Office diin ang NGO naglihok. Kini aron nga malikayan nga maabuso ang mga lumad kung aha adunay pipila ka mga grupo nga galihok nga wala na nakasubay sa saktong pamaagi.
Aron nga ma-accredit, ang NGO kinahanglang nga mosumite sa mga mosunod: 1. Duly accomplished NCIP Accreditation Form for NGOs nga ipasa ngadto sa NCIP Regional Office, pinaagi sa NCIP Bukidnon Office; 2. Certified copy of registration sa Securities and Exchange Commission (SEC) o ubang ahensya sa gobyerno; 3. Organizational structure and officers sa organisasyon; 4. Organization’s vision, mission, mga katuyoan ug tinguha, programa/plano ug mga polisiya sa pagkamiyembro; ug 5. Sinulat nga record sa kaagi sa NGO.
Kung ma-accredit na ang NGO, gikinahanglan usab ang pag-renew niini sa matag duha ka tuig.
Gipanghingusgan sa Sangguniang Panlalawigan nga giila ug gipasiugda sa estado ang mga katungod sa mga komunidad sa kulturang lumad alang sa tinguhang nasudnong panaghiusa ug pag-uswag, pinasikad sa Section 2, sa 1987 Philippine Constitution. Makita usab sa Section 39 sa Indigenous Peoples Rights Act (IPRA) sa tuig 1997 nga naghatag sa mandatu sa NCIP nga protektahan ug pagpalambo sa interes ug kaayohan sa Indigenous Cultural Communities/Indigenous Peoples (ICCs/IPs) nga adunay kalabutan sa ilang mga tinuhoan, kostumbre, tradisyon ug mga institusyon.
Gipakisayud usab kini nga kabag-ohan ngadto sa tanang mayor ug mga punong barangay sa probinsya sa Bukidnon, ingon man sa tanang hingtungdang ahensya sa gobyerno sama sa DENR, DAR, DILG, ug NCIP.
