Davao City – Dili na padugayon pa ang haya ug ilubong na karong adlaw’ng Huwebes ang nasunog nga mga lawas sa tulo ka pamilya’ng Pascual human sa gikahisubo’ng panghitabo nga sunog kagahapon sa kadlawon.
Sa pakighinabi sa DXDC News Team kang Cresencia Lauron, taga-Tagum, inahan ni Rosalie Pascual, naglisod kini og to-o sa gidangatan sa iyang anak diin gibutyag niini nga ang ulahi nilang komunikasyon mao ang bahin sa negosyo.
Sumala ni Cresencia, unya na nila hisgutan kung kinsa ang musagop kang Pamela Pascual, pinakamaguwang nga anak, kinsa nakaluwas ug padayon pa nga nagapa-alim karon sa Southern Philippines Medical Center (SPMC) ug wala pa masayod sa giadangatan sa iyang pamilya.
Kahinumdoman nga miulbo ang sunog alas 3:30 kagahapon sa Blk. 22 Lot 3 Oxford St. NHA Village, Buhangin ning syudad sa Davao, diin mikalas sa kinabuhi sa magti-ayon nga sila si Christopher Paschual ug Rosalie Pascual lakip ang ilang kamanghuran nga si Camille Pascual.
Anaa karon sa St. Peter’s-Panacan gihaya ang mga patay’ng lawas sa biktima ug plano’ng ilubong sa Buhangin Memorial Park karong adlaw’ng Huwebes.
RadyoMaN Jason Amisola
