TACLOBAN CITY – Ha gindumara nga police operation han Samar Police Provincial Office, Police Regional Office 8, ngan Tarlac City Police, napatay han mga operatiba an number 1 Most wanted person ha Samar ngan ginkikilala liwat nga Most wanted person han bug-os nga Sinirangan Bisayas.
Ginkilala an suspek nga hi Genesis Oquendo taga Calbayog City, Samar pero naging residente na ha Brgy. San Vicente Tarlac City.
Ha nakuha nga datos han RMN News team, hi Oquendo in leader han Oquendo Group nga nagbubuhat hin illegal nga aktibidadis nga gun-for-hire ha Samar.
May kaso ini nga suspek nga 2 counts han murder ngan usa nga frustrated murder nga iginsalawad han Regional Trial Court ha Calbayog City, Samar.
Dabi gihapon an suspek ha illegal drug activities kun diin napalit liwat ini hin mga pusil ngan illegal nga droga ha Tarlac ngan Cubao ha Quezon City para igdistribwer ha Calbayog City partikular ha Brgy. Carmen, Brgy. Obrero, ngan Oquendo District ha Calbayog City, Samar.
Samtang, narikober man liwat ha crime scene an usa nga caliber .45 nga pusil nga mayada sulod nga mga bala, usa nga colt caliber .45 nga pusil nga mayada liwat sulod nga mga bala, caliber .38 nga pusil ngan .45 nga pistol.
