Davao City – Pabor ang Department of Public Works and Highways Davao Region nga ipatuman ang ‘No Build Zone’ sa mga lugar nga peligroso sa bisan unsa nga kalamidad ug katalagmang mahitabo.
Uyon si DPWH-XI Spokesperson Dean Ortiz nga pugson sa gobyerno nga pabalhinon ang mga tawo nga nagpuyo sa mga lugar nga sagad hampakan sa impact sa natural calamities.
Kung madeklara nga flood-prone area ang usa ka lugar, dili na mistil pa nga paabuton nga mag-ungaw na sa ciertong kamatayon ang mga residente tungod sa katalagman diin gilayon i-relokar sa mas luwas nga dapit, segun ni Ortiz.
Apan ang pinakabug-at nga rason sa tigpamaba nganong mipabor kini sa ‘No Build & Habitation Zone’ mao ang proyekto sa gobyerno nga nalangay gumikan lamang sa mga tawo nga misupak sa kalambuan.
Giingon ni Ortiz nga sagad rason sa pagka delatar sa ilang mga road widening projects mao ang hisgutanang road right-of-way nga gipamugos sa mga tawo nga nagpuyo daplin sa dalan.
Dugang niini, ang flood control projects sa DPWH wala dayon masugdi og trabaho gumikan sa mga balay nga anaa daplin sa sapa nangatukod maingon ang kagahi sa mga tawo nga muhiklin sa mas luwas nga mga dapit.
Busa, welcome development alang kang Ortiz ang maong pogosong deklarasyon kung kini ipursige gayod sa gobyerno kay pinaagi niana, wala na unya’y makabalda pa sa ipatuman nga mga proyekto sama sa dalan ug flood control.
RadyoMaN Joel Viray
