Davao City – Usa sa nakitang solusyon karon sa Bureau of Jail Management Penology aron wala na’y droga makalusot sa mga prisohan sa rehiyon onse mao ang pagbawal sa mga piniriso ug sa mga kabanay nga magka-istoryahanay og personal atol sa visiting hours.
Subay ani, gibutyag ni BJMP 11 Spokesperson Jail Inspector Edo Lobenia nga kasamtangang ginatun-an karon sa ilang buhatan ang ‘No contact’ policy nga planong ipatuman sa tanang mga presohan sa rehiyon.
Segun ni Lobenia nga kung buot mubisita ug muduaw ang mga kabanay sa ilang mga minahal sa kinabuhi nga napriso tugotan silang magka-istorya apan ipaagi na sa selpon kun telepono ug dili na sa personal nga dakong tabang sa pagsanta sa paglusot sa iligal nga droga sa mga binilanggoan.
Nag-ugat ang maong lakang gumikan sa nahitabong drug raid sa Davao City Jail kung asa upat ka priso ang napatay ug tulo ka pulis ang samdan human nahog sa maduguon nga engkwentro ang oplan galusad niadtong adlaw’ng Domingo.
Nagposibito sa drug test ang Provincial Jail Administrator sa BJMPO Davao Del Sur nga mao si Jail Chief Inspector Roman Hernandez ug laing siyam ka inmate diin 71 porsento sa mga sakop sa BJMP ang giilisan gumikan sa naasoy nga insidente.
Samtang, nailhan na usab sa Philippine Drug Enforcement Agency 11 ang lima ka personahe sa BJMP Davao nga posibli anaa sa likod sa pagpalusot sa iligal nga droga ug kontrabandos sulod sa Davao City Jail.
Sa karon, gimando na sa Department of Justice ngadto sa Bureau of Correction nga ipailawom sa red alert status ang mga prisohan nga ubos sa kamandoan sa BJMP sa tibuok rehiyon onse.
RadyoMaN Joel Viray
