‘No helmet no travel policy’ ginapatuman na sa Bacolod

107

BACOLOD CITY  –  Ginapahanumdum ni Bacolod City Mayor Evelio Bing Leonardia ang pumuluyo nga sundon ang “ no helmet no travel” nga policy bangud madugay na ini nga laye.

 

Suno kay Mayor Leonardia nga para man ini sa safety kag kaayuhan sang mga nagasakay sa motorsiklo.

 

Pahanumdum sang alkalde nga isa ka universal rule ang paggamit sang helmet sa tagsa ka pagsakay sa motorsiklo bangud sa daku nga risgo sang aksidente sa pagsakay sini.

 

Ginpahayag naman ni Bacolod Traffic Authority (BTAO) Head PSSupt. Luisito Acebuche nga sa una nga adlaw kahapon, Marso 27, naglab-ot sa 296 ang ila nadakpan nga wala nagasuksok sang helmet.

 

Ini sila ang magabayad sang tag P300 pesos sa first offense.

 

Naglab-ot naman sa 25 ka mga motorsiklo ang na-impound kag ginguyod padulong sa opisina  sang BTAO. Suno kay Acebuche, tag P300 pesos sa gihapon ang bayad sa ‘towing’ kon may mapakita ang tag-iya sang pamatuod nga ila ini motorsiklo sa sulod sang 24 oras. Kon wala, tag P100 naman ang patak tagsa ka adlaw, tubtob nga mapakita sang tag-iya ang papeles sang motorsiklo.

 

Nahibaluan nga sa report sang World Health Organization (WHO) kapin 1.25 million ang nagakapatay bangud sa road accident sa bilog nga kalibutan kag 23 porsiento diri ang tuga sang aksidente sa motorsiklo./dyHB BACOLOD



 

 

 

Facebook Comments