No mass testing, no class opening

171

Davao City – Nanawagan karon ang Alliance of Concerned Teachers (ACT Davao) ngadto sa gobyerno nga dili lamang una buksan ang klase karong bulan sa Hunyo hangtud walay mahitabo nga mass testing sa mga tinun-an sa COVID-19.

Gibarugan ni ACT Davao President Reynaldo Pardillo ang ‘No Mass Testing, No Class Opening’ sa Hunyo sa rason nga makapaabot ra ang edukasyon apan ang kinabuhi kausa ra kutluon sa virus.


Masabtan sa pamahayag ni Pardillo nga dili lamang mga magtutudlo ang nabalaka ug dili pabor nga ablihan ang klase sa Hunyo apan lakip na ang mga ginikanan gawas lamang kon may mass testing nga matigayon.

Segun ni Pardillo, wala sila’y laing mabuhat para sa mga kabataan apan ang kabalaka lamang kung unsay mahitabo kung mugawas sila sa ilang mga panimalay ug muadto na unya sa mga tulonghaan.

Gipalanog pa niini nga sa panahon karon, lisod kaayo mokumpiyansa sa mga tawo nga makauban kon sa mga katapad kay dili masuta kon positibo ba sila o dili sa makamatay nga balatian.

Sumala ni Pardillo, wala usa’y gihatag nga programa ang Department of Education sa angay buhaton sa mga magtutudlo ug sa mga estudyante aron malikayan ang COVID-19 samtang anaa sulod sa tulonghaan.

Naglaraw ang maong grupo nga muadto sa DepEd Davao ug School Division aron makigpulong sa mga opisyales aron ipalanog nila ang ilang paghisupak sa pag-abli sa klase karong tuiga.




RadyoMaN Joel Viray

Facebook Comments