Zamboanga del Sur – Gilauman nga mapakunhod na ang ihap sa mga kaso sa COVID-19 sa probinsya pinaagi sa gipatuman nga hugtanong pagbantay sa mga border checkpoints sa Zamboanga del Sur alang sa polisiya “No Negative RT-PCR/Antigen Test, No Entry”.
Gisugdan na pag-implementar ang Executive Order No. 2021-28 nga nagmando nga kinahanglan nga mopresentar og negatibong resulta sa RT-PCR/antigen test sulod sa 72 oras ang tanang APOR ug NON-APOR travelers nga mosulod sa probinsya, lakip pa ang uban pang rekwisitos sa pagbiyahe.
Gipalawman gihapon sa mando ehekutibo ang pagbaton sa travel management system nga S-PASS.
Sa mga biyahero nga moagi lamang sa Zamboanga del Sur, kinahanglan mokuha sila og Travel Coordination Permit kung “restricted” ang lugar nga ilang adtoan samtang Travel Pass-Through Permit kung “unrestricted” ang lugar nga adtoan.
Sa gihapon, exempted kun walay labot sa travel restrictions ang pagtunod sa mga cargoes ug essential goods pasulod sa probinsya.
Kinahanglan lamang ipakita sa mga personahe nga nag-deliver sa mga produkto, ang mga dokumento sama sa company/identification card, business permit ug delivery permit.
Gitahasan karon sa pagbantay sa mga quarantine control points ang kapulisan uban ang tabang sa mga personahe sa Provincial Disaster Risk Reduction Office.
