TACLOBAN CITY – Nagburublig an sobra 700 nga volunteers ha paglimpyo han mga coastal areas ha Tacloban City dida han dominggo, February 3, 2019.
Ini in matapos mag viral ha social media an litrato ha Panalaron Bay han Tacloban nga damo an naglulutaw-lutaw nga basura.
Sumala kan Apple Alagon, usa nga businesswoman ngan volunteer, kinahanglan an mag-implementar an City Government hin ordinansa nga magkokontrol ha paggamit hin platics.
Napaka-importante daw gihapon an ma-edukar an katawhan ha pagdispose han ira mga basura, waray daw gamit it paglimpyo kun may nagkakalat la gihapon hin hugaw.
Dugang ha pamahayag ni Alagon, pwede sumubad an Tacloban ha Ormoc City nga mayada “No Plastic Day” ha adlaw han myerkules ngan Sabado.
Sumala naman kan councilor Aimee Grafil han Committee on Urban Poor and Human Housing and Resettlement, Committee on Environment and Waste Management, and Committee on Social Services, pending yana an ordinansa han pagkamayada “No Plastic Day” ha Tacloban.
Nagka-urusa an mga vounteers tikang ha San Juanico Eagles Club, EVSU Students, Dart Association of Tacloban, Tau Gamma Phi/Sigma Members, VSU Alang-Alang Students, Carigara School of Fisheries Alumni Association, Sangyaw Foundation, Rotary Club Of Ormoc Bay, PNP Maritime Group, Tacloban Barangay Officials, ngan An Waray Volunteers.
